الجمعة، 7 نوفمبر 2008

لازم ألعب...!


يماما سيبيه يلعب..يبابا سيبه يلعب
يجماعه هو لازم يلعب ..اللعب مش بس عشان يضحك ويكسر ويلخبط شكل البيت واللي انت في الآول وفي الآخر خايفة على تعبك بتاع طول اليوم
لكن اللعب عند الطفل هو أول حقوقه ..هيا حياته اللي بيرسمها في لعبه وبيخترع في لعبه وبيغني وبيني وبيمارس كل المهن في لعبته الصغيرة اللي انت عاوزة تحرميه منها عشان خايفة على منظر البيت ..
ولازم عشان نقدر أهمية اللعب بشكل أكبر لازم نعرف شوية حاجات
......
في مجموعه من علماء النفس أثبتوا ان اللعب دا له وظايف
وهنقولها باختصار وكل عالم قال انه له وظيفة شكل
حد قال ان العب بينفس عن الطفل.. يعني مثلا بنوتة مامتها قرفاها في عيشتها كل حاجة غلط عيب ..بنت..انا مش قلت ماتعمليش كده والبنت يحرام بتبص وتسكت وتحط وشها في الارض
طبعا امها فاهمة انها كده هتكون مؤدبة ومحترمة والناس كلها بتحبها
ماتعرفس انها كده بتعلمها الجبن بنتك جبانة ياهانم فوقي
تيجي البنت وهي لوحدها تجيب العروسة المسكينة بتاعتها ووتقعد تشخط وتنطر وتضرب زي ماما مابتعمل وبالظبط تقلد الحوار بتاعها
وقيسي على كده كتير
وفي عالم تاني قال ان اللعب بيخلي الطفل يبني لمستقبله يعني مثلا بيمارس الوظيفة اللي هيعملها في مستقبله يعني ازاي؟
قلت لي ازاي
يعني ولد بيشوف شرطي المرور كل يوم وهو رايح مع ماما الحضانة قبل ماتروح الشغل
ييجي باليل مع نفسه ومن غير ما ماما تشوفه يتخيل نفسه بيوقف العربيات وبيدي اشارة حمرة وخضرة وصفرة...
أنا ليه بقول ماما ماما عشان بابا دايما وغالبا بيكون في الشغل طول اليوم ومبيشاركش الأم في تربية الطفل الا بجزء بسيط جدا
بيحصل نتيجية دا حاجة من اتنين..
اما الطفل بيكون بابا بالنسبة له اللي بيعوضه عن شدة ماما معاه وبيجري عليه اول مابييجي من الشغل هربان من ماما والاب ساعات بيكون فرحان بكده وان ابنه بيحبه اكتر من امه ..دا بيكون طبعا غلط من ناحية ان الأم لما الطفل بيعمل حاجة غلط لازم بيكون في نوع من التقويم فمثلا تقوله هقول لبابا وهيزعل منك ..في الحالة دي الولد مش هيهمه زعل بابا لأنه بيحه وعارف انه مش هيزعله

أما هتلاقي الولد بيخاف جدا من باباه وبيمثله (البع بع) ودا بسبب ضغط الآم عليه والاب بعيد عنه
طبعا الوسطية هي الحل ولازم الحب من الأب وكمان يكون مقوم مباشر ليه وعشان كده لازم تعاون بابا وماما
مش كل حد منهم يقول للتاني مش هو ابنك ..بابا.. هوانا فاضي .. واسهل كلمة بيقولها ..سيبي الشغل وافضي لابنك ..وحتى لو سابت الشغل يبابا برده لازم تكون معاه انت وماما
نرجع للعب
ازاي نستفيد من لعب الأطفال بما ان دي حاجة ضرورية وبيحبها الطفل
ممكن ماما وكمان بابا على فكرة يشاركوا الطفل في اللعب ويكسبوه قيم ومباديء وسلوكيات سليمة من اللعب دا
يعني مثلا ماما لاقيت الفاظة مدشدشة فجابت احمد وقالت له ..مين كسر الفاظة ..احمد عشان خايف من شكل ماما وهيا بتستجوبه بسرعه قالها دي على ..أخوه الكبير .. فطبعا هيا عرفت انه مش على ماتجيش بقى تقيم عليه الحد وتجلده ميت جلده.. لكن ممكن تعلمه ان الكدب مش صح ومن غير ماتقوله الكداب بيروح النار لأنه مش عارف ايه هيا النار ومش مدرك ايه البتاع ده اللي بتتكلم عنه ويمكن يفتكره شيكولاته ويقولها انا عاوز نار
لكن ممكن ييجي بابا باليل بعد مايعرف يجيب احمد ويحكي له حدوتة عن الارنوب اللي كان بيكذب على ماما وبعدين التعلب كان هيكله عشان مش بيقول الحقيقة
وبكده احمد بيكون عارف ان اللي مش بيقول الحق لازم يحصل حاجة هو مش بيحبها
دا مثال
مثال تاني ..
عاوزين نعمل مع احمد تمارين رياضية عشان يتعود على ممارسة الرياضة
برده ممكن نشغل اغنية لطيفة هو بيحبها ومعاه نطنطط وهو هيقلد وهيحب كده خصوصا لما يكون الاب والام مع بعض
أو
أو
أو
حاجات كتير ممكن نعملها باللعب
وحاجات كتير العيال عاوزينها من اللعب
واحنا بس بنوبخ وبنزعق وبنرمي مسؤليتهم على بعض وفي الآخر بنرميهم في اي حضانة لمجرد تخفيف المسؤلية عننا
هنشوف بعدين ليه الحضانة وازاي نكون مع الحضانة في سد حاجات العيال
انتظروني

هناك 34 تعليقًا:

غير معرف يقول...

جميل جدا
انا من راى اننا لازم نعامل الطفل على انه طفل
مش رجل ناضج
لازم نحقق ليه كل رغباته
ونساعده على تنمة مواهبه منذ صغره
ونشجع على التفوق
وتنمية مهاراته
لاننا زى ما انتى قلتى لو احنا موتنا الحاجات دى جواه صعب نحييها تانى
خالص تحياتى

محمد فكري يقول...

موضوع موفق :)

وعجبتني طريقة المناقشة وتوضيح وجهة النظر في نقطة معاملة الطفل..بشيء من الطفولية..لا بعنف ولا باستهتار..

ومتفق معاكي في نقطة الوسطية اللي ذكرتيها ..

جهاد.. :)
شكراً ليكي على الموضوع ده

ومنتظر جديدك دايماً..

مع تحياتي..
محمد فكري

غير معرف يقول...

الغريب فى موضوع لعب الاطفال دة وعن تجربه شفتها قدامى ان بعض الامهات كل ما يجى لاولادهم لعبه جديده يخدوها منهم ويخبوها ال ايه خايفين ليكسروها طب ما يكسروها هو الطفل لو مكنش يلعب ويكسر هيلعب امتى بعد ما يكبر ؟؟

كانت نتيجه الحرمان من اللعب ان الطفل بدأ يبص على لعب اطفال غيره ويكرههم ويحقد عليهم عمركم شفتم طفل بيكرهه ويحقد؟؟؟ الغلط كان من اسلوب التربيه الغلط بصراحه انا شايفه ان كل بنت قبل ما تتجوز تعمل كورس فى تربيه الاطفال عشان على الاقل الطفل يكون طفل سوى وكل ام تبدأ تقرأ وتتعلم ازاى تعامل طفلها وازاى تربيه

شكرا يا جيجى على مواضيعك -الكميييييله- دى متعرفيش انا بححب الاطفال قد ايه-يتى كميله- انا هاين عليا ابات فى المداونه بتاعتك ههههههههههههههه

فشكووول يقول...

حاجات عيال ازيك
انا مش عارف انت راجل ولا ست لكن على العموم كلامك حلو وتعليقاتك احلى وفعلا الوسطيه هى الحل
اول مره تزورنى .. تحياتى ونورتنى ...وبعدين حرام عليك ياخى الا ان اولياء الله لا خوف عليهم ولاهم يحزنون .. ياخى خلينا فى حالنا ونمشى جنب الحيط على رأى الكحيان

رئيس التحرير يقول...

السلام عليكم ورحمه الله وبركاته
هوه دا الشغل يا عيال رجاله
بخصوص : لو اكتشفا ان البيبي بيكذب غير صحيح أن نصدمه بكشف كذبه اأنه ممكون بكده نعلمه يكذب أحسن ...

حاجــ عيال ــات يقول...

بالظبط يامحمد تمام جدا زي ماانت قلت كمان مش بس لازم نقومع لما يغلط لكن كمان نشجعه او نعززه لما يمعمل حاجة كويس
...........
الشاعر /محمد فكري
مرسي على رؤيتك الواضحة
واتمنى أكون دايما موفقة
...............
فهلا يافراشتي الرقيقة
في أمهات كتير مش عارفة يعني إيه إن ابنها يلعب وبتعتبره رجس من عمل الشيطان ومتعرفش ان في دولة من الدول الآوربية مش فاكرة اسمها ايه الحقيقة
الطفل بيروح الحضانة بتاعت والحضانة مسؤلة انها لما يروح تغير هدومه اللي جاي بيها وتلبسه اليوني فورم وتنزله الرملة وتوفله المية والكين عشان يبهدل نفسه وكمان المدرسات وبيشاركوهم اللعب اللي بتشوف انه مقزز ومقرف لأن دي ناس فاهمة ان الطفل محتاج يفرغ طاقته ويبدع كمان
وماتخافوش لما بييجي يروح بياخد الدش بتاعه ويلبس تاني ويتعطر كمان
..........
يا أستاذ فشكول مش عارف أنا ولد ولا بنت زعلتني يافندم والله
أنا بنت مصرية واسمي جهاد مشالي
لكن حضرتك نورتني الله يحظك ويحظ سيدي المححظوظ
..................

حاجــ عيال ــات يقول...

الأستاذ رئيس التحرير
رأيك على عيني وعلى راسي
فعلا يمكن دي نقطة نسيت اذكرها إن الطفل لما بيكذب أو بيمارسي فعل الكذب مش بيكون عارف إنه دا كذب لكن بيكون فاهم إنه مثلا دافع عن نفسه أو قال إلى يحميه من شده أمه أو اي سبب تاني
ولما الأم بتقوله إنت كداب بكده هي فعلا علمته الكدب من غير ماتكون هي كمان فاهمة
أطفالنا فعلا مظلومين بينا
تحياتي للرئاسة كلها

كـــيــــــــارا يقول...

اولا الف الف مبروووووووووووووووووك للمدونه

وميرسي للكلام اللي قولتيه ليا

ثانيا اللعب ده بقي معلوماتي انه بينمي ذكاء الطفل وان هي دي مزاكرته بس للي في سنه

غير معرف يقول...

على بركة الله يا جهاد

شبــ اون لاين ـــاب يقول...

ههههههههههههههههه
ههههههههههههههههههههههههههه


مش قادر مش قادر


انا دخلت سبيس تون ولا ايه


اجمل مدونه شوفتها ف حياتى

طبعا لانها بتهتم بالطفل زى ما اكيد واخد بالى

بجد لازم اتبعك يا جهاد
فكرتك روعه روعه


انا شايف كمان ان الطفل المصرى مهدور حقه بسبب العيشه الاقتصاديه اللى مصر فيها

يعنى بقى محدش فاضيله و كل اللى حوليه بيشخط فيه و هو مش عارف يعبر

بس انا اول مره اعرف ان اللعب دى طريقه تعبير عند الطفل



-----------------------------
كان معكى من امام الكيبورد
واحد مخه لاسع شويه
شبـــ اون لاين ـــاب
الاسكندريه
-----------------------------

moory-mero يقول...

السلام عليكم و رحمة الله و بركاته

أنا مبسوطة بجد أووووووووي موش عشان دي أول زيارة ليا بالعكس عشان لاقيت هنا الجزء اللي بتمناه وعايشة معاه وبتمنى يكتتبهولي ربنا أنا بعشق عالم الاطفال وبحس إنهم محتاجين عالم ودنيا تانيه كل حب ودفء ولعب ومرح بنسى همومي بضحكتهم ودموعي بتجف من لمسة منهم
بحب أوي لعبهم وشقاوتهم بفرح أوي وانا وسطهم وبلعب معاهم وبضايق أوي لما ألاقي أمهات واخوات موش عارفين يتعاملوا مع الأطفال أو مثلا يتريقوا عليا ويقولوا ايه ده سايبه البنات وقاعده مع الاطفال تلاعبهم ايه الهبل ده
حاسه بجد ان الاطفال موش واخدين حقهم برائتهم وشقاوتهم جميله اوي

بشكرك تاني مرة على إنك خلتيني أنسى همي ولو لثواني و أنا في مدونة بيبيز جميلة كده وكمان سمعت الأغاني اللي بحبها و خصوصا شاطر شاطر بتفكرني بحبيبة

ربنا يوفقك يا قمر وفرحانه اوي انك منصراوية

و إن شاء الله متابعاكي

في رعاية الله

الكحيان يقول...
أزال المؤلف هذا التعليق.
الكحيان يقول...

أسلوبك جميل ياجهاد،وموضوعك تربوي مفيد جدا وحيوي للغاية، وأنا شاكر لك على مرورك بمدونتي وأتمنى دوام التواصل. أما بالنسبة لمسألة اللغة، أعجبني عشقك للغة وغرامك بها، واللغة مثل الحبيبة المدللة لا تمنح نفسها للحبيب بسهولة إلا عندما يشقى من أجلها ويرفع النوم عن أجفانه ويسعى إلى إرضائها بكل السبل ويذود عنها بروحه ودمه هنا تأتيه طائعة لينة وتكون ملك يمينه، وخير الأمور الوسط.... لكن أؤكد لك مرة أخرى أن أسلوبك مشرق وجميل ولذيذ .

حاجــ عيال ــات يقول...

كيــــارا
نورتيني ياقمراية
ومرسي على التهنئة الجميلة
يارب دايما أكون عند حسن ظنكم
..........
الأستاذة/ نادية الكيلاني
اسمكم المكتوب على مدونتي يسبب لي السعادة
.........
وصلنا للشباب
دايما شباب ياشباب
متشكرة على رأيكم في المدونة
وموضوع المدونة بيفرض عليا إنها تكون زي اسبيس تون
نورتوني ياشباب والله
..............
ميرو /بنت المنصورة العزيزة والجميلة وما أدراك ما بنات المنصورة
البنوتة اللي بتحب الأطفال لقيت كمان اللي بتحب الأطفال وانا سعيدة بيك وأكيد هنتقابل إن شاء الله قريب
..........
الكحيان باشا بيه أفندي
هو صحيح كحيان لكن على عينا وراسنا كمان
كلامك يغذيني أيها الحامي حمى الضاد
أنتظر إطلالتك

عايش علي الهامش يقول...

في الاول انا مبسوط جدا من الاغنيه دي احد المفضلات ليه

اسلوبك في اول الموضوع بيفكرني باعلان احمد ماهر في حملات تنظيم الاسره وهو بيسمع للطفل وهو بيقول
يا ماما يا بابا انا عاوزكم تعلموني الخ..

الطفل هو النفس في انقي صورها واهش حالاتها كل لمسه تحدث في نفسه خدشا لا يصلح الا بشق الانفس
من حق الطفل ان يلعب ده حتي منظمة الامم المتحده عملت جمعيه او منظمه اصغر ان صح التعبير منظمه ريت تو بلاي بتلف كل انحاء العالم وتخلي العيال بكل مستوياتهم تلعب _صحيح بيلعبوا كوره مع زيدان بس وماله اه احسن من مفيش

انا عارف ان الوسطيه هي الحل بس احيانا الامور مش بتحتاج لوسطيه لا بتحتاج لتفاهم الطرفين يعني الاب يشد والام تحن بس لازم الوضع يتقلب تاني يعد وقت بسيط والام تشدوالاب يحن وبكده يبقي الابن اقرب للاتنين وفي نفس الوقت سوي
ده طبعا مجرد راي

شكرا لك

mohamed ghalia يقول...

عندك حق فعلا
لازم نسيبهم يلعبوا
وهم حتى يلحقوا يتمتعوا شوية قبل ما يشوفوا إلى أهاليهم بيشفوه
تحياتى

mahasen saber يقول...

يا سلام الموضوع ده رائع برافو عليكى وهيفدنى جدا مع ابنى

برافو برافو برافو
الله ينور عليكى

اقصوصه يقول...

فعلا اللعب شيء مهم جدا في حياتة الطفل

واحيانا في حيااة الكبار بعد :)

تدوينه جميله:)

غير معرف يقول...

عندما حدثنى ابنى وتلميذى
الكاتب والمخرج المسرحى الشاب
محمد صلاح موافى
عن هذه المدونة
لم اصدق ما وصفه لي
وفى نفس الوقت اندهشت لما يقوله محمد
لانه معروف عنه انه مش بعجبه حتى العجب العجاب
للك قررت ان احضر بنفسى
وانتهزت فرصة لقائى به
وطلبت منه الاطلاع على المدونة
وجبت اركانها
ودهشت مما فيها
فقد كان محمد على حق
وانا اعشق الاطفال
ولا بد لنا فعلا ان نعلم ما هى احتجات اطفالنا
لا بد وان نغرز فيهم مبادئنا وتعاليم ديننا الحنيف
مواضع هائلة واسئلة هامة طرحتيها
ربنا يوفقكم

حاجــ عيال ــات يقول...

أهلا بإنسان عايش عى الهامش
ليه عايش على الهامش رغم إنك مش على الهامش ولا حاجة
المهم فعلا الطفل نفس في أنقى صورها
لكن المهم هتفضل نقية كده اغاية إمته ...أكيد لغاية ما احنا ندمر نقاءها ده
أشكر وجودك الجميل

حاجــ عيال ــات يقول...

أستاذ محمد مشاركتك أسعدتني وزي ماقلت لازم نسيبهم يلعبوا
تحياتي

حاجــ عيال ــات يقول...

مدام محاسن الجميلة
مرسي جدا على وجودك هنا
والحمد لله إن موضوعي هيفيد حضرتك
يارب دايما أكون محققة الافادة للجميع

حاجــ عيال ــات يقول...

أقصوصة
اسمك جميل
ياريت كمان مش بس نسيبهم يلعبوا ونلعب معاهم
شرفتيني ياأحلى أقصوصة

حاجــ عيال ــات يقول...

الأستاذ أحمد البشيهي
أشكر وجودك معي وأشكر الأستاذ محمد صلاح موافي على حسن ظنه به
وأرجو أن أكون عند هذا الظن
وأتشرف بوجدكما معي دائما

كلام على بلاطة يقول...

اللعب مطلوب
وياريت نرجع عيال تانى

GiGi world يقول...

الله ايه المدونه الجميله دي
بجد راااااااائعه مدونه جميله فكره العيال دي حلوه قوي والاغنيه اللى انتى حطاها تحفه
وفعلا الطفل لازم يلب مع الاعتذار لكل ام خايفه على البيت يتبهدل معاكى جدااااااااااااا
واقبلينى فى عالمك اللذيذ موت ده

حاجــ عيال ــات يقول...

كلام على بلاطة
مرسي على صراحتك ومرسي كمان على رايك اللي اكيد هيهمني
.........
الجميلة جيجي أنا كمان بيدلعوني بجيجي
سعيدة بيك هنا معايا في العالم الذيذ عالم العيال

mahasen saber يقول...

قوليلى يا جميله انتى دراستك ايه صحيح

ده مش تشكيك فى قدراتك بس سؤال عن جذور ثقافتك ...فى معاملة الاطفال وقراية سلوكهم

حاجــ عيال ــات يقول...

الجميلة الغالية /محاسن صابر
أنا سعيدة بيك للمرة التانية عندي
طبعا مفيش شك من حقك تسألي عن مصدر ثقافتي
أنا في آخر سنة في كلية رياض الأطفال جامعه المنصورة
وأي أسئلة تانية أنا مستعده ليها على الرحب والسعه
تمام ياجميل....؟

رابطة هويتي اسلامية يقول...

السلام عليكم ورحمة الله وبركاته

نتشرف أن ندعوكم إلي زيارة رابطتنا " هويتي إسلامية ".

رابطتنا جسر من التواصل بين المدونين أصحاب الفكرة

رابطتنا رفض لما يبعدنا عن هويتنا الإسلامية

نحن أصحاب الفكرة انتم أصحاب الانجاز

كونوا معنا للرقي و النهوض

الدعوة خاصة ليست عامة لنا شروط فيمن ندعوهم أنت واحدا منهم

فشكووول يقول...

هو لعب العيال ضرورى كما قال علم النفس وهو ليس مجرد لعب انه ممارسه حياه فالطفل لا يعرف الا اللعب واللعب هو كل خبراته فى الحياه ..فاذا منعناه عن اللعب منعناه عن ممارسة خبراته وعلى العموم
اهلا اهلا يا حاجات عيال شرفتينى ونورتينى
البنت الاولى احلى من التانيه والواد التانى يعنى شكله معقول عن الواد المهبب الاولانى يعنى الموضوع التانى عكس الاول تمام البنت التانيه لابسه بدى ولازق فى جسمها وحاطه حوالين عنيها حاجه خضراء مش عارف اسمها ايه .. والله شكل الراجل بالضبظ بس فيها تقاسيم المرأه أما الاولى زى القمر .. والله زى القمر .. امال انا كنت عايز حد يخزق عنين فشكول ليه

حاجــ عيال ــات يقول...

الرابطة الاسلامية
أهلا بكم ومرحبا
زيارتكم تعد شرفا لي
أما عن الانضمام فلي الفخر ان أكون كذلك ..لكن امهلوني كي أزوركم واعرف عنكم ...وانتظروني
.............

حاجــ عيال ــات يقول...

فشكووووووووووول
أهلا ياعمو والله فرحت قلبي ..ربنا يفرح قلبك..

الواد والبت دول لخبطونا لكن عرفونا بعمو الفشكول

تحياتي للحبايب

abolobna_ali يقول...

مرحا مرحا بعالم المدونات ...

لى عظيم الشرف بتصفح مدونتكم .

شكرا