الأحد، 2 نوفمبر، 2008

استعنا على الشقا بالله


سلام جميل على كل العيال وأم العيال وأبو هم كمان عشان مانزعلش حد مننا
أكيد كلنا بنتعامل مع أطفال وفيه إللي بيقدر يتحمل ..شقاوتهم..لماضتهم .. وأسئلتهم اللي ساعات كتييير مش بنلاقي لها إجابة وبيكون شكلنا وحيييييييييييش
لكن ولو ..
وفي اللي مش بيقدر يتحمل كل ده وأول ماالعيل ينطق يقوم مديه بونية كاتمه ..هو في الحقيقة يجماعه مش بس بيكتم صوته دا كمان بيكتم حجات حلوة كتيرة جواه والحاجات دي لما بتموت مستحيل ترجعها تاني لأن الطفل بيكتسب جذور شخصيته في السن ده ..إنت بقى بسم الله ماشاء الله ناصح بتخلع الجذور دي بحرفية قال إيه بتربيه وبتعلمه..
الحقيقة ياجماعه إحنا اللي عاوزين نتعلم ..نتعلم إزاي نعلم ..وهنعلم إيه؟
الطفل مخلوق جميل ..محتاج الجمال عشان يقدر يكون دايما جميل
واللي مستعد معانا يتعلم بسرعه يسجل اسمه هنا عشان يعرف حاجات العيال وإزاي نقدر نوصل الحاجات دي.
على فكرة أنا سامعه واحد من بعيد بيوشوش مراته ..
أيوة إنت ممكن أعرف بتقولها إيه
أنا بصراحة مش مقتنع بموضوع إننا نتعلم دي هو بعد ماشاب ودوه الكتاب ولا إيه
ثم أنا بربي إبني زي ماربناي أبويا وأنا قدامكم أهو زي الفل
طيب ياسيدي إنت زي الفل بس هسألك سؤال إنت في مرة ماحسيتش إن والدك كان غلطان في حاجة كده ولا كده واتمنيت إنه يتصرف بشكل إنت شايفه أنسب
بصراحة حصل
كام مرة؟
يعني.. مش فاكر
مش فاكر ..يعني كتير؟وكنت احساسك إيه وقتها؟
ياااااااه إنت هترجعيني لأيام الطفولة المشرده..كنت بقول إني كل ده مش هيحصل لما آجي أربي ولادي
جمييييييييل..دا سببه باختصار ومن غير لف ودوران إن كل وقت وله ظروفه وله ثقافته وانت كنت محتاج حاجات أبوك معرفهاش عشان ماعشهاش..ومحدش عرفهالو وكمان هو ماحاولش إنه يعرفها
لكن إنت لازم تعرف عيالك محتاجين إيه وتتعلم إزاي توصله
وفي الآخر إنت الكسبان
وهيكون زي ماكلنا إتعلمنا (سندنا..وضهرنا ) وكمان هيكون ذخر ليك في الجنة
قال الرسول صلي الله عليه وسلم
إذا مات بن آدم انقطع عمله إلا من ثلاث
صدقةٌ جارية
علم يٌنتفع به
أو ولد صالح يدعو له
صدق رسول الله

يعني ياأخي تبطل وشوشة مع الست هانم مراتك وتقوم تسجل اسمك بسرعه عشان تلحق مكان

واعرف حاجات عيال

هناك 26 تعليقًا:

Ahmed Al-Sabbagh يقول...

بداية موفقة
تصميم جميل وكلام أجمل

غير معرف يقول...

الله الله على المدونة التربوية الجميلة دى

مدونة تخاطب الوالدين والطفل ومحيطه

العائلى باختصار تعيد صياغة الجميع

على اسلوب تربوى علمى عصرى ملتزم..

مبارك يا جهاد

مبارك أيها المطلعون على هذه المدونة

أنتم المتفيدون أولا وأخيرا

نادية كيلانى

شفقة هانم واحسان بك يقول...

البوست جميل جدا وفكرته جديدة ومختلفة
اتمنى لك مزيد من التقدم
تحياتى

ما بعد الغروب يقول...

ايوه يا جوجو يا مولعاها

المدووه حلوه اوى والله مش مجاامله يعنى

القالب لطيف والبوست دمه خفيف

يلا ربنا معاكى وهنتظر البوستات

ستك وتاج راسك غروب

حاجات عيال يقول...

ياخبر يانهار جميل
خالو عندنا يامرحبا هات الشاي والقهوة والجاتو ...واي حاجة يأمر بيها خالو الجميل
شرف ليا وجودك معايا يافندم
دعواتك
جهاد مشالي

حاجات عيال يقول...

الأستاذة الصحفية الشاعرة والحبيبة الى قلبي نادية الكيلاني
مرسي على كلامك الجميل وأتمنى أكون دايما عند حسن ظن حضرتك

................
شفية هانم وأحسان بيه
والله نورتوني ..أمال فين العيال مش كنتم تجيبوهم يلعبوا معايا..احم احم ..قصدي من الأولاد
نتقابل في الكلاس...الفصل يعني بس بالايطالي
.............
البت العكروتة (غروب)
سيتي وتاج راسي ماثى بس لما اشوفك
المهم ماتتأخريش عن الحصة

جهاد مشالي

غير معرف يقول...

ألف مبروك عزيزتي جهاد
المدونة جميلة جدا و التصميم ممتاز
جديد و خفيف رائع يا جهاد و بالتوفيق إن شاء الله

نزهة النميلي

رئيس التحرير يقول...

حاجــ عيال ـــات :
السلام عليكم ورحمه الله وبركاته .
أحلي عيال ..جهاد بنتي الكبيره (البكريه)وانا وعيالي سنكزن في انتظاركم ...اشكركم علي زيارتكم وياريت تتكرر...هايل جدا يا عيال يارجاله ....

محمد صلاح موافى يقول...

ايه الحلاوة دى
حاجة جميلة جدا
بصراحة الواحد مش عارف يقول ايه
ده شغل عيال رجالة بجد
مينفعش تعتبرونى عيل معاكم
وتاخدونى معاكم
ههههه
بجد شغل جميل
و ننتظر المزيد
والله انا فكرت انى اكتب مسرحية للاطفال واسميها حاجات عيال واهديها للمدونة دى
وليكم حرية التصرف فيها
ربنا يوفق الجميع
تحياتى

حاجات عيال يقول...

الأنسة المغربية الجميلة والشاعرة /نزهة
مجرد سماع اسمك يحدث لي استقرار
أشكر وجودك جانبي حبيبتي
...........
أهلا برئيس التحرير والأستاذ ..
نورت ياأبو العيال..نورت مدرسة بنتك البكرية جهاد مشالي
وعاوزة أشوف العيال كلهم هنا يطنططوا حواليا
ربنا يخليك لكل العيال
............
ايه يارجالة اللي بيحصل دا الأستاذ المخرج المسرحي محمد صلاح موافي شخصيا بيزورنا في المدرسة بتاعتنا ..شرف عظيم أفندم..بس دا مش كفاية لا زم تسجل اسمك وتحضر معانا كل الحصص

تحياتي لجميع العيال واهالي العيال
جهاد مشالي

محمد صلاح موافى يقول...

ياريت والله اسجل معاكم
بس ازاى
انا بصراحة عمال اضحك
خايف تجيلى ازمة تانى من كتر الضحك
وبعدين مخرج سابق ناوى اعتزل خلاص
بس افضل كاتب مسرحى
وافضل اكتر محمد من غير اى مهنة
بصراحة بحييكى على مجهودك الرائع
ايه اكتب مسرحية حاجات عيال
ولا بلاش
الفرصة مرة واحدة بس
هههههههه
بس انا مخدتش بالى ان ماما نادية موجودة هنا ومتقوليش ماشى ياماما
وكمان نزهة هنا
ايه الصحبة الحلوة دى
خالص تحياتى وحبى واحترامى وتقديرى وكل حاجة حلوة

رئيس التحرير يقول...

القاص الجميل /رئيس التحرير حسين حامد
القصتين مكتوبين بنوع من الحرفية مش حد هاوي او مبتدا فواضح ان حضرتك متمرس كتابة لأنك تمتلك ادوات القصة بشكل جيد
ومع بعض ازامات التلقي الطفيفة اللي واجهتني انا بالتحديد
إلا إني بعلن إعجابي بأسلوب حضرتك في الكتابة

تحياتي وتقديري
أحلي عيال رجاله ..ما المقصود عندكم من (مع بعض ازمات التلقي )اريد ان افهم كي لا تكون هناك ازمات في الفصل الثالث..شكرا علي تواصلكمو متابعتكم اللطيفه .

كراكيب عادل يقول...

انا عندي احساس انة هيتقال هنا كلام جميل جدااا

يالا منتظرين الحجات الحلوة

البداية مشجعة واسم المدونة كمان

فعلا هما محتاجين حد يتكلم عنهم

قمر النيل يقول...

ابنتى العزيزة / جهاد
الف مبروك على المدونة ذات الطابع الخاص والفريد ، دائماً تطلى علينا فى أبهى صورك ، إلى مزيد من النجاح والتألق تقبلى خالص تحياتى واحترامى واتفضلى هذه المساهمة البسيطة:

الانتقاد يعلم الطفل الادانة
العداء يعلم الطفل القتال
الاستهزاء يعلم الطفل الخجل
الخزي يعلم الطفل الشعور بالذنب
التسامح يعلم الطفل الصبر
التشجيع يعلم الطفل الثقة بالنفس
الثناء يعلم الطفل التقدير
العدل يعلم الطفل الانصاف
الامان يعلم الطفل الاخلاص
الاستحسان يعلم الطفل محبة النفس
القبول والصداقة يعلمان الطفل ان يجد المحبة في كل مكان

حاجات عيال يقول...

أحلي عيال رجاله ..ما المقصود عندكم من (مع بعض ازمات التلقي )اريد ان افهم كي لا تكون هناك ازمات في الفصل الثالث..شكرا علي تواصلكمو متابعتكم اللطيفه

الأستاذ القاص كلاكيت تاني مرة
لو كنت حضرتك ربطت بقيت الجملة هتلاقيني بقول أزمات تلقي خاصة بي بالتحديد لكن النص جيد حقا
وسعيدة به
............
أهلا بأبو الكراكيب حقيقي نورتني وأسعدتني
وانتظر مني شغل العيال
بس تعالي وهات كل العيال معاك
..............
الأستاذ العزيز( قمر النيل)/أحمد عطية
وجودك أسرني وأرجو ألا تقاطع هذا المكان....
لعللك تزور عزيزتك كوكو واواو

الفراشة يقول...

ألف مبروك يا حبيبه قلبى على المداونه العسوله دى حقيقى مداونه جميله ومختلفه تماما عن كل المداونات اللى شفتها قبل كدة واحلى حاجه فيه جو الطفوله الجمييييييييييييل دة

هبه يقول...

ايه يا بنتي الحجمال ده

العنوان فظيع

المحتوى فوق الفظيع

في انتظار المزيد

بالتوفيق

حاجات عيال يقول...

الفراشة بحالها طارت وجات عندنا
مشرفني وجودك ياحبيبة قلبي
واوعي تغيبي عني
............
هبه هانم اسماعيل زوجة المدعو...ربنا يرجعهولك بالسلامة يارب
مرسي على وجودك ياحبي
وكل سنة وانتوا طيبين ..تعالوا زورونا ...باي باي
.......

محمد فكري يقول...

جميل جداً يا جهاد

بداية موفقة..
وبإذن الله مواضيعك التالية تكون ليها شكلها الخاص والمفيد..

.......
يللا شدي حيلك

مع تحياتي..
محمد فكري

حاجات عيال يقول...

الشاعر الجميل /محمد فكري
انا سعيدة بوجودك معايا وكمان بشكرك على مجهودك معايا وأسئلتي المملة اللي اخيرا خلصت منها..على ماعملت المدونة
.....
بصراحة يا جماعه محمد فكري والآستاذ أحمد عطية(قمر النيل) ساعدوني كتير في تصميم المدونة أنابشكرهم جدا

ايهاب محمد يقول...

مساء الخير على شاعرتنا الرقيقه جهاد
فعلا موضوع اكثر من رائع احييكى عليه
أسف لتاخرى فى الرد
انا على فكره بعشق الاطفال اوى وأستمتعت وانتى تحللى المموضوع وخصوضا مع الاغنيه بتاعه نانسى عجرم
والتصميم والصور كله والله رائع ياجهاد
فعلا انا حاسس بأنك فنانه
وليتك تكررى الموضوع وتستعينى بالصور الاطفال وتكتريها شويه لو سمحت ومع الاغانى ايضا.
اشكرك وتقبلى تحياتى


ايهاب محمد

حاجات عيال يقول...

أستاذ إيهاب محمد
أشكر تواجدك في متصفحي
وأشكرك على رأيك الذي يؤخذ به على أي حال

mero-moory يقول...

السلام عليكم و رحمة الله و بركاته

ياااااااااااااااه موش عارفه ليه بتمنى وأنا بقرأ كلامك ربنا يكتبلي أكون أم قريب ويبقى عندي الكائنات الجميلة دي بحب الأطفال بشكل جنوني بحب تعاملهم كلامهم حياتهم أكلهم نومهم مرحهم ضحكهم
بفرح بيهم وببقى عايزة لما أشوف أي طفل ألعب معاه دايما و أسيب أي حاجه في ايدي
بجد مناقشتك للعالم ده وكلامك عنهم ضروروي ومهم جدا ومفروض الكل يعمل كده مع هذه الكائنات البريئة دي مخلوقات في حمى ربنا الأول وحمانا

رائعه ياقمر في موضوعك

تسلمي

ومتابعاكي

في رعاية الله

ا.ح يقول...

بسم الله الرحمن الرحيم
السلام عليكم ورحمة الله وبركاته

اهلا اهلا اهلا جوجو
ايه يا بنتي الشغل الجامد ده (بسم الله ماشاء الله) ايوة كدة ارفعي راسنا
تسلم ايدك يا قمري تصميم المدونة بتاعتك فوق الوصف (ربنا يديم عليكي تميزها)
غير بقى الموضوعات اللي بتتناولها
تصدقي مجاش في بالي خالص اعمل مدونة بتتكلم عن الاطفال
ياللا ان شاء الله تلاقيني نطالك هنا على طول
اوعي تكوني لسة معرفتنيش
انا نوسة

هبه إسماعيل يقول...

ايوة كده
ابتدينا الشغل الجامد
بجد من غير مجاملة
اسلوبك في تناول الموضوعات
عاجبني جدااااااااااا
وأعتقد أنه هيكون أحد العوامل الأساسية في نجاح المدونة دي

يلا اللي بعده

فتوح أبو المفاتيح يقول...

خير ان شاء الله
------------
شئ عظيم جدا
وربنايوفقك فيه
بس ليا اعتراض صغير
-----
هو اعتراض شكلي
الاسلوب محتاج يكون اكثر تحديدا لو هتشتغلي بنفس الفونت واللون والحجم
او
تصغري الفونت وتغيري اللون الاحمر
وتثبتي الاسلوب

لأن الاسلوب برضه كويس
وربنا يوفقك
ويهدي على ايديكي ناس كتير
وومكن نخلي حبيبة تساعدك
:)

-------
سلام عليكم